飄逸的感覺~

2007年6月3日 (星期日) 酷熱天氣警告

今日天氣好熱, 可能好耐未試過咁熱, 感覺上好似特別熱咁
上面既太陽好似犯人燈咁照住我
熱到我都豁左出去, 著吊帶出街,
由得d byebye肉見人
對眼好辛苦, 為免曬黑, 都係擔遮好d

先兩日放工飛小巴去整左負離子
好貴...整左$506, 因為用左一隻貴既護髮素同直髮水
效果好似比以前既好 (心理上覺得)
我剪返之前o係大學果時個樣
睇落好似後生d (好似~_~)
好舒服, 風吹就飄飄下
久違了的感覺又返黎嗱...哈哈
佢仲送左一支護髮素, 同焗油卷..
下次修一修果時順便焗下護下髮先

今日同媽媽哥哥飲完茶, 去左佢屋企
整左個cheese cake, 好眼訓
因為cheese cake 要焗 好耐
尋晚好夜先整, 整到成3點鐘
整果樣無果樣...原來屋企無麵粉, 又爛左個打蛋器
要用隻食甜品既叉黎打滑d cream cheese , 隻手同膊頭好痛呀
o係"百無"既情況下, 焗左出黎硬左d ..個餅底應該係cookie 餅底
結果變左鬆餅底=.=...(因為無麵粉, 用左自發粉代替)
返左工好想整野食, 不過整左無人食..
荒廢精湛既煮藝了..

今日都有去行ikea, d 傢私好靚
特別係好似長腿叔叔果d 英式古典櫃
我最想第時我間屋係咁既..
唔使好, 夠住就得嗱...大約300-400尺左右啦 (2人住)
最緊要地點有地鐵, 交通方便, 近買送既...
張床可以既話要靠窗, 有一個好大既衣櫃可以放哂我既衫
梳妝台可以唔要, 但定要有一張好大既書台,
書台隔離要有一個大既書櫃 (因為我鐘意睇書)
中間可以放一D 少擺設既
廁所最好有浴缸, 無錢買或者唔夠大既唔要都得
廚房要用具齊全, 因為我鍾意煮飯
要有一個可以烤雞既焗爐
梳化要布藝果D, 兩坐位都夠嗱
傢俱以木為主, 最好有似古典味既設計
(如果唔明睇下長腿叔叔或者HARRY PORTER啦)
呢間係我既DREAM HOME
我會為左佢努力賺錢架..
到時新居入伙, 大家可以按上面幾點送入伙禮物比我們
我請大家食入伙酒...哈哈